2014年6月2日

《哥斯拉》Godzilla (2014, dir: Gareth Edwards)






可以講吓幾點(劇透):

・首先好多觀眾,包括我,對呢類災難片、特攝片要求越來越高,今次都仲可以,但係如果荷里活拍極都係咁,呢類電影仲可以玩幾耐?仲要翻拍幾多次?

・近年好多大片,電影公司都傾向搵啲新導演/無乜拍大budget 片經驗嘅導演,出發點可能係希望新導演可以拍返佢嘅特色出黎,俾啲新鮮感觀眾。至於效果就有好有唔好,有時會見到個導演根本未handle 到咁大製作。今次Godzilla 搵嘅導演Gareth Edwards 拍Godzilla 之前只拍過一套長片,另外有做開Visual Effects 嘅工作。而睇完Godzilla 之後,我係睇唔到佢有咩長處或特色。呢套Godzilla 究竟經導演處理後,同其他特攝片、災難片、外星人片有咩分別?我感受唔到,我只係覺得好多野都好平實,要不停轉場景(我真係唔係咁鍾意),有咁快得咁快咁講晒個故事俾觀眾聽。至於電影嘅Visual Effects 我又唔覺有幾特別,表達手法有幾唔同,難免有點失望。





・Juliette Binoche 嘅出場可以以秒數計...我寧願無人話我知佢有份,等到時我有啲啲驚喜,好過而家我有啲啲被騙嘅感覺。




・Elizabeth Olsen 好啲,出場時間唔少,但又其實無乜戲可做,可惜。如果睇佢睇多次MMMM好過。

・全套戲咁多個角色(包括怪獸s) ,最好睇係Mr. White,無論個角色定係Bryan Cranston 嘅演技都好睇好吸引。不過呢個角色咁快死,實在同個仔建立唔到多少關係。

・而家啲怪獸越黎越大,就越黎越唔好睇,因為佢地太勁喇。就好似今次咁,勁到要搵哥斯拉怪獸打怪獸...大佬我又唔係日本人,我真係對隻野無感情嫁,我點解會有興趣睇三隻核突野打黎打去? 結果,見住隻哥斯拉就黎死,真係得渡邊謙一個人想喊...

・有段運火車運彈頭嘅戲,我覺得個場景做得幾好,不過黑夜大霧 + 又高又長嘅火車木橋好似好多電影都出現過,會唔會無新意咗少少呢?另外,有段係玩Bay Area Bridge 定唔知Golden Gate Bridge...可唔可以唔好套套災難片都整吓條橋呢...仲要次次都有架滿載𡃁仔嘅巴士係條橋上面...蜘蛛俠救咗佢地嫁喇...幾年前....

(唔知Transformers 會唔會整爛青馬大橋...?)

・電影仍然有好多無厘頭情節,例如渡邊謙呢個日本科學家同美國將軍一段對話,渡邊謙無啦啦拎咗隻因為廣鳥原爆而停咗嘅陀錶出黎,話隻錶係佢老豆俾佢,imply佢自己係反核/反戰。成套戲其實無乜講反核,但係係無舖排嘅情況下,無啦啦導演要由渡邊謙把口講出套戲有個咁嘅message 實在好核突。

・唔知點解,我見到呢班怪獸食核彈做食物,真係覺得好唔對路。

・以前啲大片、災難片、外星人片,總會有Mr. President 嘅戲份, e.g. Deep Impact, Independence Day, The Day after Tomorrow,etc。但係近年嘅好似無咗呢個習慣,係咪啲編劇驚觀眾睇到厭?但係我又覺得,去到咁大件事,都無呀Mr. President 出黎撐吓場、講兩句,又好似令我覺得件事唔夠大。係電影入面,邊個係呢個Mission 嘅總指揮?我依稀記得吓個演員個樣,但連個角色名我都講唔出。咁如果觀眾代入咗,覺得個Mission 做得唔好,應該搵邊個問責?